खज्जि !
'खज्जि', 'खाजै' घौरवळि , 'नींदै' सौत च। अर खाज, मैलौ नौनू अर फोड़ा-फुन्स्यूं को भै-बंध। चिरोड़ा, रगसिणी अर दमद्यड़ा, खज्या नाति-नत्याणा अर पुराणा दाग-धब्बा नौ का निसाण, खज्या नौना-बाळा ब्वल्ये जंदन। एक नौ हौरि च- लौलि! य खज्जी पीठी बैण च। लौलि, खज्जि से हौरि बि जलनखोर च। 'झीस' नौ का घास-पत्वा सुख्यां-सख्यां लड़ीक अर जंगळि 'गौंछि' लौलि तैं उकसौणौं काम कर्दन। लौलि चण्डाळ च । लौलि पर हाथ लगौणौ मतबल, मुसीबत मोल ल्येेणु च। लौैलि जै पर एक दौं चिब्टिदि च त जौ-सौ सान्त नि होंदि। लौलि चिब्टुण पर मनखि, बौळ्या सि ह्वे जांदू।
ज्यूंदा सरेलौ तैं खज्यू गुलाम ब्वल्ये जांदू। पर यिं बात तैं हम मन बुथ्योणू ब्वल्दाँ। असल बात त या च कि सरेल खज्यू गुलाम न बल्कण मा खज्यू परमेसुर च। किलैकि, सरेल नि होवु त खज्जि अपड़ो मुंड खड़ो नि कर सक्दि। वुन त क्वी बि, सरेल अपड़ा नजीक खज्जि तैं नि आंैण देंदू। जनि खज्जि मुंड उठौंदि, सरेल वीं तैं दबौंणै कोसिस मा साम-दाम-दंड-भेद, ज्वी हाथ लगू वी अजमौंण लग जांदू। फिर्बि खज्जि, चुप नि रौंदि बैठीं। जनि एक जगा मा दबाये जांदि, स्या हैंकि जगा बिटि मुंड उठै देंदि। पर इथगा हाय-तोबा मचवेकि बि खज्यू जोग खरण्यां हि रै। खज्ये-खज्येकि बि खज्या जोग मा, जमा पूँज्या नौ पर जम्यूं 'ल्वे' अर 'मवाद' मिल्दू।
कति लोग ब्वल्दन खज्जि भगौणौं एक हि तरिका च - निंद। पर निंदै बि खज्जि दगड़ा कख चल्दि। निंद जख सांत सभौ कि अदमेण च त खज्जि, जल्लाद टैपै बबाल्या कज्याण । हमुन त यु देखी कि खज्जि अर निंदै, कबि नि बणी। खज्जि समाज मा मर्च च अर निंद, मिट्ठू सैत च। दूयूं का न गुण मिल्दन न सभौ। अज्यूं बि जख खज्जि होंदि वख निंद नि औंदि। निंद तब औंदि जब वीं का नजीक 'चैन' रौंदू। चैनौ एक नौ आराम बि च। चैन खज्यू क्य लग्दू यिं बातौ अबि ढंग कै पता नि चलि। पर हम इथगा जरूर जणदाँ कि चैन तब औंदू जब खज्जि चल जांदि। चैन तैं खज्जि, पसंद नी। अर जब निंद तैं चैन मिल जांदू त तब निंद तैं कै हैंकै बि परबा नि रौंदि। पर खज्जी मर्जी रौंदि कि वींका ओर-पोर, वीं उकसौंण वळा घुमणा रावुन। वुन बि कै तैं उकसौंण, भड़कोण वळों कि कमी, कक्खि बि नि रौंदि। इलै जख खज्जि ह्वलि वख गंध अर बास नौ का द्वी निरभागि, वीं उकसौंण, भड़कौंण वळा जरूर मिल जाला। अर जब खज्जि दगड़ा गंध अर बासै जादा घुटुण बैठ जांदि तब देखा तुम खज्यू रुतबा...।
'जुवाँ' अर 'लीखा' खज्या न्यूत्याँं मैमान छन। होंदू क्य च कि जबारि तलक सरेल चैन मिल्णा तरिकौं ढुढणू रौंदू, खज्जि, जुवाँ अर लीखौं बुलैकि लै जांदि। क्वी ब्वल्दू अजि खज्जि तैं जुवाँ अर लीखौं बुलौणैं जरोरत छयिं नी। सरेल अपड़ि लति-कपड़्यूं अर साफ-सफै पर ध्यान नि द्यो त जुवाँ अर लीखा त अफ्वी ऐ जंदन। कुछ लोग यि बि ब्वल्दन कि खून मा गन्दग्या बजै से खज्जि होंदि। इलै खून साफ अर जगदू-भगदू होण चऐणू च।
कति खूनौ तैं सरेला भित्रौ चौकिदार ब्वल्दन त क्वी ब्वल्दू चौकिदार च वो अपड़ि मौ! क्य कन्न इना चौकिदार जु जुवाँ अर लीखौं का डौर्न छुटि-छुटी लौस्यूं का प्वटगा सुद्दि अगतयूं सि भगणू रौंदू। अरे....! जु बग्त मौका पर डौरन भगणू रावु , वो बि क्वी चौकिदार होयु। तौंकु ब्वनू बि सै च पर हम यकै बात पर बिस्वास कैकि हैंकै बात नि छोड़ सक्दाँ। बीचै बाटु पकड़ि हम यि बोल सक्दाँ कि सरेलौ तैं कपड़ौं कि साफ-सफै कि उथगि जरोरत च जथगा खूनै साफ-सफै कि। कुल मिलैकि, सरेला भैर अर भित्र, द्वी खोळ साफ-सुथरा होण चऐणा छन। पर यिं बात तैं जन हम ब्वना छां तनि लोग झणि कब बिटि अजमौंणा छन। आखिर, कु निरभागि ह्वलू जु चैन सि नि बैठुण चालु। फिर्बि, हम द्यखणा छां कि साफ सुथरु रैकि, हैजा जनि बिमारि त खतम ह्वेगि पर या निरभागि खज्जि खतम होणौं नौ नि लेणी।
एक बात हमुन हौर देखी कि द्वीपाया अर चौपायों पर त खज्जि, कुछ जादै चिब्टीं रौंदि। वो द्वीपाया -चौपाया पराणि चा खुला आगास मा घुमुण वळो होवू चा गैरा समोदर मा डुब्की लगौण वळो; तौं मद्दि क्वी निरभागि इनो पराणि नि, जु खज्या कब्जा मा नी। खज्जि खज्योंद- खज्योंद तौं बिचारौं कि खाल छिल्ये जांदि पर खज्जि तैं जमा बि दया नि औंदि। द्विपाया-चौपाया चा लाख दौं माटा मा लपोड़्यो, चा साफ पाणिन् ध्वेकि अजमै ल्यो , खज्जि भगणौं नौ नि लेंदि। हौर त हौर, कै बार त खज्जि तौंकि मति बि भरमै देंदि। कुखड़ा अर बखरै धौण अच्छयाणा मा धरीं रौंदि पर तौंकु ध्यान अपड़ि खज्जि बुथ्योण पर चल जांदू। द बता! ज्यान सि जादा प्यारि खज्जि! स्या बि त मति भरम हि त होंदि!
कु नि जणदू, आग थम्ये जांदि, बाढ़ बि थम्ये जांदि, हवा रोक-टोक कैकि रुक जांदि अर बरमुंड चढ़्यूं गुस्सा बि कोसिस कैकि तौळ उतुर जांदू पर खज्जि तैं थमुण बड़ो मुसकल काम च। खज्जि एक बार सुरु ह्वेगि त जौ-सौ रुक्दि नि। 'गूणी-बांदर्वी' आधा सि जादा जिंदगी त खज्जि खज्योण मा खप जांदि। कै बार त तौंका बीच खज्जि खज्योणै, 'बज्जि' सि लगीं रौंदि। गैंडै खज्जि तब सान्त होंदि जब गैंडा कचील मा डुब्की मर्दू। हाथी अर पंछी-पोतळ्वी खज्जि साफ पाणि मा नहे कि सान्त नि होंदि। मन मारी खज्जि बुथ्योणू तौं बिचारौं साफ पाणि मा नहे कि फेर धूळ - माटा मा नहेण प्वड़दू।
पराण्यूं का बीच मनखि एक इनो, अकेलू पराणि च जै पर कयि किस्मै खज्जि होंदिन। ब्वल्ये जांदू कि जब मनख्या नजीक लक्छमी औंणै नौबत औंदि त वेका हाथू पर खज्जि लग्दि। कर्ज- पात चुकौंद दौं वेका, बरमुंड पर खज्जि लग्दि। मार खाणै नौबत औदि दौं कपाल पर खज्जि लग्दि। वुन त मनखि, खज्यू कुट्यारु च। मनख्या सरेल मा नौे द्वार छन। पर क्वी बि द्वार इनो नि जै पर खज्यू कब्जा नी। कुल मिलैकि मनख्या सरेल मा क्वी जगा इनि छयिं नी, जख खज्जि नी। आँखा खज्जि, कंदूड़ खज्जि, नाक खज्जि। जख देखा, खज्जि - खज्जि - खज्जि!
इज्जत एक इनो गुण च जै मनखी, अपड़ो चितौंदू। मनखि ब्वल्दू बि च कि फूका सब्बि धणि चल जावू पर इज्जत बचीं रावूं, इलै इज्जता डौरन मनखि जख-तख खज्जि नि खज्योंदू। पब्लिका बीच खज्जि खज्योणू तैं मनखि समटौंणू रौंदू पर खज्जि पर हाथ नि डळदू। पर कै बार खज्जि इथगा आग बबूला ह्वे जांदि कि जन कनक्वे थम्यां 'धीरज' अर 'सरम' बि वींका ऐथर हथ-खुट्टा छोड़ दिंदन। अर ब्वन वळा यि बि ब्वल्दन कि जैन भ्वरिं सभा मा खज्जि रोक यालि त समझ ल्या वेन जग जीत यालि।
एक बात हौर, सब्य समाज मा खज्जि खज्योण वळै सरम हर्चि जांदि। वुन त खज्जि छयिं बेसरम च। पर जै मनखि तै इज्जतै परबा नि रै जांदि, वे कि खज्जि कुजागा लग्दि। भ्वरिं सभा मा बि वेकु हाथ कुजागा चल जांदू। कयि कमबख्तू तैं त खज्जि खज्योंणैं आदत सि प्वड़ जांदि। खज्जि नि बि होंदि सि तब बि खज्जि खज्योणा रंदन।
कति लोग व्यसनी होण मा बि अपड़ि पुलबै चितौंदन। एक भंगल्या अपड़ि छात्या बटन उधाड़ी ब्वनू छौ कि तुम म्यरु सरेर जख मर्जी तख खज्ये ल्या। म्यरा सरेल मा खज्जि खज्योण मा बि भंगलै गंध औंदि।
खज्जि मा खटिट-मिट्ठि दवै, काम नि कर्दन। घ्यू, तेल, मळै लगैकि बि खज्जि खतम नि होंदि। सूणी च कबि - 'दाद, खाज, खुजली का दुस्मन, जालिम लोसन।' जरा अंताज लगा दि ! जैं बिमारि खतम कन्नौ तैं, 'जालिम ' जना नौ को मल्लम लगौंण प्वड़दू वा बिमारि कथगा खतरनाक ह्वलि।
जणगूर लोग त यख तलक ब्वल्दन कि मनखि, जुवौं का डौरन् घाघरु नि छोड़दू पर खज्या डौरन् पाण्या तौळ बैठ जांदू । कति लोग इना बि छन जु ब्वल्दन कि खज्जि तैं थम्णू एक हि इलाज च कि पाणी ढंढी उंद फाळ मार द्या। द बता....! य त वी छ्वीं ह्वे कि अपड़ै हथुन, अपड़ो गौळू ऐंठा। ढंढी उंद फाळ मारि, कैकि खज्जि सान्त ह्वे होवु इनो मर्द कु बच्चा, हमतैं अज्यूं, क्वी नजर मा आइ नि।
कैका मामला बीच प्वड़णै बि कयि लोगु पर खज्जि होंदि। तौं क्वी पूछू चा नि पूछू पर किलैकि तौं पर खज्जि होंदि इलै सि जै-कैका बीच मा प्वड़ जंदन। कयि लोग तौं बीच प्वड़ण से पैलि, थमणै कोसिस कैकि ब्वल्दन- 'झगड़ा, यूं दुयूं का बीच च। त्वे पर क्या च, खज्जि लगीं'? पर तौंकि खज्जि तौं बीच बिटि, हटण नि देंदि। कै बार, ओर-पोर वळा त, मौका देखी, हट जंदन पर बीच मा प्वड़यां सि खज्जि वळा, जुता खै जंदन। बाद मा बि तौं सुणणू मिल्दू कि क्या रै ह्वलि तै पर खज्जि लगीं? इलै हि त ब्वल्ये जांदू कि कैका बीच सुद्दि नि प्वड़ा। पर खज्जि, चुप कख रौण देंदि। ना ब्वल्द-ब्वल्द खज्जि तौं, रगड़ा-झगड़ौं का बीच धकेल देंदि।
क्वी एक दिन हमतैं बिंगौणू छौ कि खज्जी एक 'खास्यत' बि च। हमुन पूछि- क्या खास्यत? वेन जबाब दे- कि खुदानाखास्ता तुम तैं कक्खिम् सवालौ जबाब देणू नि औणू त तुम फौरन खज्जी, खज्ये ल्या। बस, समझ्ण वळो समझ जालु कि तुम तैं अगनै, कुछ बि पुछणै जरोरत छयिं नी।
कयि ब्वल्दन अरे वे मनख्यू, मनखी क्या ब्वन द्यब्ता बोला, जै पर खज्जि नी। सि इन इलै ब्वल्दन किलैकि तौंन क्या, हमुन बि सूणी कि देवी-द्यब्तौं पर कबि बि खज्जि नि लग्दि। हाँ! इथगा जरूर च कि द्यब्तौं से तौळ बल नारदजी एक इना देब रिसी छया जौं पर हौरि धाण्यूं कि त ना पर गिच्चै खज्जि छै। पर तौंकि स्या खज्जि, संगसारै भलै कु छै।
एक दिन य गिच्चै खज्जि हम पर्बि लगि। पौधि पब्लिका बीच, कुजागा खज्जि खज्योंद देखी हमुन एका बेसरम तैं टोकि- हे भै भला मनखी!! त्वे सरम नि औणि?
वेन तड़म जबाब दे- खज्जि होणि त क्य खज्योण नी?
वेका बाद त जब तलक हम तैका समणा बिटि हटि नि छां, स्यू हमतैं लिकलै-लिकलैकि खज्जी, खज्योण पर लग्यूं रै।
एक मसल च कोढ़ मा खज्जि। पैलि त य कोढ़़ नौ कि निरभागि बिमारि कै पर नि हुंया। कै ह्वे बि ग्या त वाँ पर खज्जि नि हुयां। अर अगर कोढ मा खज्जि ह्वेगि त समझ ल्या सर्रा बरम-करम इक्खि झड़ ग्येनि। अर सूणा त सै हमारि एक बात हौरि बि सूणीं कि जन औता तैं धन प्यारु होंदू वुनि कामचोर तैं बल खज्जि प्यारि होंदि।
क्वी माणू चा नि माणू पर यिं बात तैं क्वी ठुकरै नि सक्दू कि खज्या पैथर हाथौ, भौत बड़ो हाथ च। किलैकि जबारि मैल भगौणै नौबत औंदि, उबारि हाथ, हाथ पर हाथ धौरि बैठ्यूं रौंदू, बौगा सार देंदू। मजाल क्या, वू कैकि सुण द्यो। अर जब आतुरि औंदि तब देखा तुम खज्या पैथर हाथ- खुट्टौं कि नचानची..।
त भयूं! अब याँ का अलौ खज्यूं तैं न कुछ ब्वनू बच्यूं न लेखणू रयूं। पर इथगा लेख्ण मा हमतैं कैकि डौर नि रयिं कि सौ मूसा खैकि बल बिराळू हज घूमी ऐ जांदू। गंगा मा नहे कि सुंगरा पाप धुये जंदन। एक तोता, हैंका तोता मा अपड़ा पाप करम सुणैंकि बल अपड़ा पाप काट देंदू। पर खज्जि...? हज्जि...! एक दौं सुरु होण चऐणि च फेर त... पूछा ना जि...!
नरेंद्र कठैत फेसबुक वॉल पोस्ट
व्यंग संग्रह बक्की तुमारी मर्जी से प्रकाशित व्यंग
